Füzuli rayonundakı məktəbdə gərginlik: Direktor məktəbi şəxsi təsərrüfatına çevirib?

Füzuli rayonunun Kərimbəyli kəndindəki şəhid Əkrəm Səlimov adına tam orta məktəbdə qalmaqallı hadisələrin baş verdiyi iddia olunur.

News365.az-a daxil olan məlumata görə, məktəbin direktoru Cəfərzadə Rəvan tərəfindən təhsil müəssisəsində çalışan müəllim Hüseynova Alimənin işdən uzaqlaşdırılıb.

İddiaya əsasən, direktor kənd təsərrüfatı sahəsində işləyən Alimə Hüseynovanı təhqir edib və onun yerinə katibənin gətiriləcəyini qeyd edib.

Mənbənin sözlərinə görə, direktorun etikadan kənar davranışı bununla məhdudlaşmır. Bildirilir ki, o, daha 2-3 texniki işçiyə qarşı da təzyiq göstərir, onları incidir və hədələyir. Bu vəziyyətin məktəb kollektivi arasında ciddi narahatlıq və təşviş yaratdığı qeyd olunur.

İddialara görə, müəllimlər imtahandan kəsildiyi üçün, işdən çıxarılıb, heç bir yerdə işləyə bilmir. Ancaq direktorun bacısı imtahandan kəsilsədə işləyir və əməkhaqqı alır.

İddialar arasında başqa məqamlar da yer alır. Belə ki, məktəbin işçisi kimi göstərilən Bədəlov Vüqarın faktiki olaraq işə gəlmədiyi, onun Qarabağ ərazisində direktora məxsus olduğu deyilən şəxsi mülkdə fəaliyyət göstərən marketdə çalışdığı iddia edilir. Həmçinin qeyd olunur ki, direktorun ailə üzvləri – anası və həyat yoldaşı da işə gəlmədən qanunsuz şəkildə əməkhaqqı alırlar.

Məlumatda vurğulanır ki, baş verənlər məktəb kollektivində narazılığın artmasına səbəb olub. Bəzi müəllimlərin məsələ ilə bağlı aidiyyəti qurumlara müraciət etməyə hazırlaşdıqları bildirilir.

Qeyd edək ki, səsləndirilən iddialarla bağlı hələlik rəsmi qurumların mövqeyi açıqlanmayıb.